Condition of Nepal's Photo Studio Businessmen
नेपाली फोटो स्टुडियाेकाे चुनौती, अवसर र सम्भावनाहरू
नमस्कार ! म विक्रम न्यौपाने, २५ वर्षदेखि फोटोग्राफी व्यवसायमा संलग्न छु। लामो यात्राका यी वर्षहरूमा व्यवसायले थुप्रै उतारचढावहरू पार गर्यो। फोटोग्राफी व्यवसायले डिजिटल युगमा पाएको चुनौती र अवसरबारे चर्चा गर्न चाहन्छु। साथै, यस व्यवसायले छुटाएका केही महत्त्वपूर्ण अवसरहरूबारे पनि चर्चा गर्नेछु।
फोटोग्राफी व्यवसायमा देखिएका परिवर्तनहरू
हाल, सबैसँग उच्च गुणस्तरका मोबाइल क्यामरा उपलब्ध छन्, जसले गर्दा साधारण फोटोहरू खिच्न स्टुडियो जानुपर्ने बाध्यता छैन। पासपोर्ट र लाइसेन्सका फोटोहरू सम्बन्धित निकायहरूले नै खिच्न थालेका छन्।
के फोटोग्राफीको माग घटेको हो?
यद्यपि स्टुडियोमा आउने पारम्परिक कामहरू घटेका छन्, फोटोग्राफीको समग्र माग भने बढेको छ। विगतमा साधारण रूपमा गरिने विवाह, व्रतबन्ध, र अन्य संस्कारहरूमा फोटो र भिडियो खिच्नुपर्थेन। तर, अहिले ती सबै कार्यहरूमा फोटो र भिडियोको माग अत्यधिक बढेको छ।
विवाह मात्र होइन, विवाहअघि र विवाहपछि विभिन्न फोटोशुटका लागि पनि फोटोग्राफरको आवश्यकता पर्छ। यसबाहेक, म्याटरनिटी फोटोशुट, न्युवर्न बेबी फोटोशुट, र अन्य व्यक्तिगत तथा व्यवसायिक फोटोशुटको माग पनि उच्च छ।
फोटोग्राफी व्यवसायलाई सफल बनाउनका लागि केही महत्त्वपूर्ण पक्षमा ध्यान दिन आवश्यक छ:
प्रविधिको सही उपयोग: डिजिटल प्लेटफर्म र सामाजिक सञ्जालको उपयोग गरेर टाढा टाढाबाट पनि ग्राहक आकर्षित गर्न सकिन्छ। अनलाइन विज्ञापन र डिजिटल मार्केटिङले व्यवसायलाई नयाँ उचाइमा पुर्याउन सक्छ।
प्राविधिक प्रशिक्षण र लगानी: फोटोग्राफीमा नयाँ प्रविधि र शैलीहरूको अध्ययन गरी तिनलाई आफ्नो व्यवसायमा लागू गर्दा धेरै फाइदा पुग्न सक्छ। क्यामेरा र अन्य उपकरणहरूको आवश्यक्ता र क्षमताको पहिचान गरेर मात्र लगानी गर्नु बुद्धिमानी हुन्छ।
नयाँ सेवा तथा उत्पादनहरू: पहिले कप, क्यानभास, कुसन, मोबाइल केस, र स्टोन प्रिन्टमा फोटो राख्ने चलन थिएन, तर अहिले यी सबै सेवा फोटोग्राफी व्यवसायका लागि अवसर हुन्। फोटोग्राफी व्यवसायमा थुप्रै अवसरहरू भए पनि कतिपयले सही समयमा ती अवसरहरूको उपयोग गर्न सकेनन्। इभेन्ट फोटोग्राफी र भिडियो ग्राफीको सम्भावना: धेरै फोटोग्राफरहरूले केवल स्टुडियो फोटोमा मात्र ध्यान दिए। इभेन्ट फोटोग्राफी, कर्पोरेट फोटोशुट, र प्रोडक्ट फोटोग्राफी जस्ता अवसरहरूको उपयोग गर्न सकेनन्।
कन्टेन्ट क्रियशन र सोसल मिडिया म्यानेजमेन्ट: फोटोग्राफीबाट सिर्जित कन्टेन्टको महत्व अहिले जति कहिल्यै थिएन। युट्युब, इन्स्टाग्राम, र टिकटक जस्ता प्लेटफर्महरूमा कन्टेन्ट क्रियटरहरूका लागि फोटो र भिडियोको माग अत्यधिक छ। फोटोग्राफरहरूले यस क्षेत्रमा पनि ध्यान दिनसकेको देखिँदैन।
अनलाइन कोर्स र प्रशिक्षण: डिजिटल युगमा फोटोग्राफी सिक्न चाहनेहरूको संख्या धेरै छ। अनलाइन कोर्स र प्रशिक्षण कार्यक्रमहरू सञ्चालन गरेर फोटोग्राफरहरूले नयाँ आम्दानीको स्रोत बनाउन सक्छन्।
डिजिटल युगले फोटोग्राफी व्यवसायलाई थुप्रै चुनौती र अवसर दुवै प्रदान गरेको छ। पुरानो सोच र काम गर्ने शैलीमा मात्र अड्किएर बस्ने व्यवसायीहरू पछि परेका छन्, तर प्रविधिको सही उपयोग गरेर, नयाँ अवसरहरूको पहिचान गरी अगाडि बढ्न सक्नेहरूलाई सफलताको नयाँ उचाइ हासिल भएको छ।
फोटोग्राफी व्यवसायले नयाँ सम्भावनाहरूमा ध्यान दिन सकेन भने, ठूला अवसरहरू गुम्न सक्छन्। प्रविधि, समय, र बजारको माग अनुसार आफूलाई रूपान्तरण गर्दै अगाडि बढ्नेहरू कहिल्यै पछाडि पर्दैनन् ।
यस ब्लगमार्फत मैले मेरो अनुभवलाई सरल भाषामा प्रस्तुत गरेको छु। तपाईंहरूको प्रतिक्रिया र सुझावका लागि सदैव तत्पर छु। धन्यवाद। फाेटाेग्राफर बिक्रम न्याैपाने
